అంతర్జాతీయ మార్కెట్లో భారీ పతనం*  –*బంగారం – వెండి ధరలకు ఒక్కరోజే భారీ షాక్*

అంతర్జాతీయ మార్కెట్లలో చోటుచేసుకున్న కీలక పరిణామాల నేపథ్యంలో బంగారం, వెండి ధరలు ఒక్కసారిగా భారీగా పడిపోయాయి. ఒక్కరోజులోనే బంగారం ధరలో దాదాపు 10 శాతం తగ్గుదల నమోదవడం దేశీయ మార్కెట్‌లోనూ ప్రభావం చూపుతోంది.తాజా సమాచారం ప్రకారం, తులం బంగారం ధర ఒక్కరోజే రూ.19,750 మేర తగ్గింది. ప్రస్తుతం 24 క్యారెట్ల 10 గ్రాముల బంగారం ధర రూ.1,49,653గా కొనసాగుతోంది. ఇటీవలి రోజులుగా స్థిరంగా ఉన్న బంగారం ధరలు ఒక్కసారిగా భారీగా పడిపోవడం పెట్టుబడిదారులను ఆందోళనకు గురి చేస్తోంది.

అదేవిధంగా వెండి ధరల్లో కూడా తీవ్ర పతనం నమోదైంది. ఒక్కరోజే కిలో వెండి ధర రూ.1,07,971 వరకు తగ్గింది. ప్రస్తుతం దేశీయ మార్కెట్‌లో కిలో వెండి ధర రూ.2,91,922గా ఉంది. అంతర్జాతీయ మార్కెట్‌లో వెండి ధరలు సుమారు 34 శాతం వరకు పడిపోవడం ఈ తగ్గుదలకు ప్రధాన కారణంగా విశ్లేషకులు చెబుతున్నారు.

డాలర్ బలపడటం, అంతర్జాతీయ ఆర్థిక పరిస్థితులు, పెట్టుబడిదారుల లాభాల స్వీకరణ (ప్రాఫిట్ బుకింగ్) వంటి అంశాలు బంగారం, వెండి ధరల పతనానికి కారణాలుగా భావిస్తున్నారు. రానున్న రోజుల్లో అంతర్జాతీయ మార్కెట్ పరిస్థితుల ఆధారంగా ధరల్లో మరింత మార్పులు చోటుచేసుకునే అవకాశం ఉందని నిపుణులు అంచనా వేస్తున్నారు.