అమెరికాను వణికిస్తున్న మంచు తుఫాను.. స్థంభించిన జన జీవనం.. వేల విమాన సర్వీసులు రద్దు..

అమెరికాను భారీ మంచు తుఫాను వణికిస్తోంది. ఈ మంచు తుఫాను కారణంగా అమెరికాలో దాదాపు 20 కోట్ల మంది కష్టాలు పడుతున్నారు. అమెరికాలోని పలు రాష్ట్రాల్లో మంచు, వర్షం కురుస్తున్నాయి. రికార్డు స్థాయి కనిష్ట ఉష్ణోగ్రతలు నమోదవుతున్నాయి. ముఖ్యంగా టెక్సాస్, ఓక్లహోమాపై మంచు తుఫాను ప్రభావం ఎక్కువగా ఉంది. ఈ భీకర మంచు తుఫాను కారణంగా అమెరికాలో వేల కొద్దీ విమాన సర్వీసులు రద్దవుతున్నాయి. శనివారం 3,200 విమాన సర్వీసులు, ఆదివారం మరో 4,800 విమాన సర్వీసులు రద్దయ్యాయని ఫ్లైట్ ట్రాకింగ్ వెబ్‌సైట్ ఫ్లైట్ అవేర్ వెల్లడించింది. రానున్న కొద్ది రోజుల్లో ఈ మంచు తుఫాను ప్రభావం మరింత ఎక్కువ కావొచ్చని, ఈ నేపథ్యంలో రవాణా కష్టాలు మరింత పెరగవచ్చని విశ్లేషణలు వినిపిస్తున్నాయి. అవసరమైతే తప్ప ఎవరూ బయటకు రావొద్దని అధికారులు హెచ్చరికలు జారీ చేశారు మంచు తుఫాను కారణంగా అమెరికాలోని కెంటకీ, కాన్సస్, వర్జీనియా, జార్జియా, మిసిసిపి రాష్ట్రాలు ఎమర్జెన్సీ విధించాయి . ఈ దశాబ్దంలోనే ఇది భారీ మంచు తుఫాను అని వార్తలు వస్తున్న నేపథ్యంలో చాలా రాష్ట్రాలు అప్రమత్తమయ్యాయి. సుదూర ప్రయాణాలు చేస్తే మంచులో చిక్కుకుపోయే ప్రమాదం ఉందని అధికారులు హెచ్చరిస్తున్నారు. పరిస్థితులు సద్దుమణిగే వరకు అప్రమత్తంగా ఉండాలని సూచించారు.